Toulouse lagði Frakklandsmeistara Lyon

Toulouse sem mætir Liverpool í forkeppni Meistaradeildarinnar í vikunni, gerði sér lítið fyrir og lagði Frakklandsmeistara Lyon þegar liðin mættust í frönsku úrvalsdeildinni í gær.

Meistarar Lyon sem leika hér í gulum og svörtum treyjum urðu fyrir skakkaföllum á 35. mínútu þegar sænski miðjumaðurinn Kim Kallstrom var rekinn af velli með rauða spjaldið. Kallström gerðist sekur um brot og óhóflegt orðaval við dómarann en skaphiti hans var kannski skiljanlegur þegar litið er á endursýningu að formálanum. Ekki má annað sjá en að Kallström hafi fengið olnbogann í andlitið frá Nicolas Dieuze leikmanni Toulouse án þess að dómarinn tæki eftir.

Þrátt fyrir liðsmuninn reyndist það heimamönnum í Toulouse erfitt að koma boltanum í netið. Mauro Cetto var þó nálægt því en skalli hans fór í þverslána. Lyon varð fyrir enn frekari skakkaföllum í síðari hálfleik þegar meistararnir misstu Sidney Govou og fyrirliðann Cris meidda af velli.

Það stefndi í markalaust jafntefli þar til á loka-andartökum leiksins þegar Svíinn Johan Elmander skoraði eina mark leiksins fyrir heimamenn í Toulouse sem landaði þar með sínum fyrsta sigri á tímabilinu. Keppni í úrvalsdeildinni er þó aðeins nýhafin og annarri umferð deildarinnar lýkur í dag.