Verðlaunaður fyrir að bjarga lífi móður sinnar

Átta ára drengur, sem bjargaði lífi móður sinnar síðasta sumar, var í dag valinn skyndihjálparmaður ársins af Rauða krossinum. "Hundrað og tólf" dagurinn er í dag og í ár var hann tileinkaður sjálfboðaliðum.

Fjölbreytt dagskrá var víða um land í tilefni dagsins. Á hádegi lagði 112 lestin af stað frá Skógarhlíð en á bilinu þrjátíu til fjörtíu bílar lögreglu, slökkviliðs og björgunarsveita voru í lestinni, auk þyrlu Landhelgisgæslunnar sem flaug með. Lestin endaði ferð sína við Smáralindina þar sem fólki bauðst að skoða tækin auk þess sem björgunaraðgerð var sviðsett.

Rauði krossinn tilkynnti í dag að Egill Vagn Sigurðsson hefði verið valinn skyndihjálparmaður ársins og tók hann við viðurkenningunni í Smáralindinni.

Hann sýndi mikið snarræði þegar móðir hans missti meðvitund vegna bráðaofnæmis síðasta sumar. Hann sótti adrenalínpenna í veski móður sinnar, sprautaði hana í handlegginn og hringdi síðan í neyðarlínuna eftir hjálp.

Egill Vagn bar sig rétt að öllu en það var móður hans til lífs að hún farið yfir það með honum hvað þyrfti að gera ef eitthvað kæmi fyrir hana. Hann kunni líka að nota adrenalínpennann og vissi hvernig ætti að nota hann.