Innihald í íslenskum kjötvörum oft á tíðum óljóst

Eftirlit með notkun bindiefna í kjötvörur er lítið hér á landi. Umhverfisstofnun veit ekki hvað helsta bindiefnið í kjötvörum, svokallað tendin, inniheldur. Þetta er á meðal þess sem kemur fram í fréttaskýringaþættinum Kompási í kvöld.

Þónokkrar heildsölur í Reykjavík selja bindiefni til matvælaframleiðenda. Einn helsti eiginleiki efnanna er að binda vatn í vörunni. Kjúklingabringur innihalda meðal annars 10 prósent viðbætt vatn og ýmsar aðrar kjötvörur innihalda svipað magn. Kjötframleiðandi á Akureyri er uggandi vegna þessarar þróunar og segir það óhuggulegt að neytendur viti ekki hvað sé í kjöti né hvaða áhrif það hafi. Sömuleiðis sé það græðgissjónarmið að þyngja kjötið með vatni og láta neytendur borga brúsann. Í sama streng tekur Jóhannes Gunnarsson, formaður Neytendasamtakanna.