Einhugur um að koma í veg fyrir kjarnorkuáform Írana

Angela Merkel, kanslari Þýskalands, sagði í morgun að alþjóðasamfélagið væri einhuga í að koma í veg fyrir að Írönum takist að koma sér upp kjarnavopnum og varaði þá við undanbrögðum. Undirbúningur að hernaðaraðgerðum gegn Íran er sagður langt kominn innan bandaríska stjórnkerfisins.

Merkel ávarpaði ráðstefnu um öryggismál sem hófst í München í Þýskalandi í morgun en þar skeggræða 250 áhrifamenn á þessu sviði um ýmis mál á borð við stöðuna í Mið-Austurlöndum og baráttuna gegn hryðjuverkum.

Í setningarræðu sinni sagði Merkel algera einingu ríkja um að koma í veg fyrir að Íranar komi sér upp kjarnorkuvopnun. Ennfremur varaði hún þá við að einangrast ekki enn frekar vegna skorts á samvinnu við Alþjóðakjarnorkumálastofnunina. Í ræðu Vladimirs Pútín Rússlandsforseta kom aftur á móti fram hörð gagnrýni á valdbeitingu Bandaríkjamanna um allan heim og sakaði hann þá um að knýja önnur ríki til vígbúnaðarkapphlaups.

Erindrekar klerkastjórnarinnar í Teheran eru á fundinum og er búist er við að Ali Larijani, aðalsamningamaður hennar, muni tjá fundargestum að Íranar hafi einungis í hyggju að nota kjarnorkuna í friðsamlegum tilgangi.

Breska blaðið Guardian hefur eftir heimildiarmönnum sínum í Washington að undirbúningur að hernaðaraðgerðum gegn Íran sé langt kominn innan bandaríska stjórnkerfisins og ættu þær jafnvel að geta hafist með vorinu. Þó er talið líklegra að ekki verði ráðist í þær fyrr en á næsta ári, skömmu áður en George Bush Bandaríkjaforseti lætur af embætti.

Í grein blaðsins kemur fram að Dick Cheney varaforseti sé í forystu þeirra sem telja að ráðast eigi á Íran vegna kjarnorkuáætlunarinnar en Condoleezza Rice utanríkisráðherra og Robert Gates landvarnaráðherra leggist hins vegar gegn því.