Frakkarnir lentir í Þórshöfn

Leikur Færeyinga og Frakka getur farið fram í dag eins og áætlað var eftir að gestirnir náðu loks að lenda í Þórshöfn. Mikil þoka var í Færeyjum í gær og því þurftu Frakkarnir að lenda í Noregi.

Samkvæmt reglum UEFA höfðu Frakkarnir rétt á að krefjast þess að leiknum yrði frestað af því þeir komust ekki á leikstað 24 tímum fyrir leik, en þeir ákváðu að spila leikinn.

Alls var franska landsliðið og fylgdarlið þess í þremur flugvélum og þurfti hluti þess, m.a. fjölmiðlamenn, að lenda á Egilsstaðaflugvelli í gær. Þar var þó ekki um að ræða neina af leikmönnum liðsins eins og nokkrir miðlar héldu fram í gær.