Englendingar í góðum málum

Englendingar hafa átt náðugan dag í leik sínum gegn Eistum í undankeppni EM og hafa yfir 3-0 á Wembley þegar flautað hefur verið til hálfleiks. Þá hafa skotar yfir 2-1 gegn Úkraínumönnum og virðast ætla að halda toppsætinu í sínum riðli.

Það var Shaun-Wright Phillips sem kom enska liðinu á bragðið eftir aðeins 12 mínútur þegar hann prjónaði sig í gegn um vörn Eista og skoraði eftir sendingu Micah Richards. Wayne Rooney skoraði loksins fyrir landsliðið þegar skot hans hrökk af Raio Piiroja og í netið - en þetta var fyrsta mark Rooney fyrir Englendinga síðan á EM 2004. Þriðja mark enska liðsins var svo sjálfsmark frá Taavi Rahn, sem skallaði fyrirgjöf Ashley Cole í eigið net alla leið frá vítateigslínu.

Skotar hafa yfir 2-1 gegn Úkraínu. Kenny Miller kom Skotum í 1-0 snemma leiks eftir aukaspyrnu frá James McFadden og skömmu síðar skoraði Lee McCulloch gullfallegt mark, sitt fyrsta fyrir Skota. Markahrókurinn Andriy Shevchenko minnkaði muninn fyrir Úkraínu.

Einum leik er þegar lokið í undankeppninni þar sem Slóvakar burstuðu San Marino 7-0 í D-riðli.