Fleiri uppsagnir munu fylgja í kjölfarið

27. september 2007 16:07

Uppsagnir 100 starfsmanna í sjávarútvegsfyrirtækjum á Eskifirði og í Þorlákshöfn koma Friðriki J. Arngrímssyni, framkvæmdastjóra LÍÚ ekki á óvart. Hann segir þetta hafa legið í loftinu og að hans mati fylgja fleiri uppsagnir fylgi í kjölfarið.

„Það þarf ekki að koma neinum á óvart að gripið sé til uppsagna þegar veiði dregst saman um 63 þúsund tonn, eða einn þriðja af heildaraflanum," segir Friðrik í samtali við Vísi. „Því miður hefur þessi niðurskurður áhrif, bæði til sjós og lands og þetta á eftir að gerast á fleiri stöðum," segir hann.

Friðrik segir að uppsagnirnar á Eskifirði og í Þorlákshöfn séu aðeins byrjunin á því sem koma skal. „Ég býst við fleiri uppsögun á næstu dögum. Stjórnendur þessara fyrirtækja sem verða fyrir niðurskurðinum verða að bregðast við til þess að láta fyrirtækin ganga, og þá verða menn að bregðast við með þessum hætti, því miður," segir Friðrik.

Tengdar fréttir

Nærri 60 manns sagt upp hjá Humarvinnslunni í Þorlákshöfn

Stjórn Humarvinnslunnar í Þorlákshöfn hefur ákveðið að segja upp öllu starfsfólki í landvinnslu fyrirtækisins í Þorlákshöfn, alls 59 manns. Ákvörðunin var tilkynnt á fundi með starfsmönnum í dag.

27. september 2007 15:27

Eskja segir upp nærri 40 manns vegna kvótaniðurskurðar

Sjávarútvegsfyrirtækið Eskja á Eskifirði hefur ákveðið að segja upp öllum starfsmönnum í frystihúsi félagsins, 39 talsins. Ástæðan er niðurskurður á þorskveiðiheimildum sem stjórnvöld kynntu fyrr í sumar.

27. september 2007 13:25

Uppsagnirnar komu ekki á óvart

Trúnaðarmaður starfsmanna í Humarvinnslunni segir að uppsagnirnar í þar komi ekki á óvart. Þegar lítið sé um hráefni sé reksturinn erfiður. Hún hafi því vissan skilning á ákvörðun fyrirtækisins. Hún vill lítið segja til um það hvernig þeim sem misstu vinnuna muni reiða af. „En það er ekki hlaupið í næstu vinnu,“ segir Lydía.

27. september 2007 16:02

Það er ekkert gleðilegt á Eskifirði

"Það er ekkert gleðilegt hjá fyrirtækinu í dag. Það er alveg ljóst," segir Hrafnkell Hlöðversson, öryggistrúnaðarmaður hjá Eskju á Eskifirði, við Vísi en um 40 manns, öllu fólki í landvinnslu, var sagt upp störfum hjá fyrirtækinu í dag. Ástæða uppsagnanna er skortur á hráefni vegna niðurskurðar þorskkvóta.

27. september 2007 15:52

Reiðarslag fyrir lítið byggðarlag eins og Þorlákshöfn

„Þetta er náttúrlega reiðarslag fyrir lítið byggðarlag eins og Þorlákshöfn og manni finnst það svolítið öfugsnúið að þær byggðir sem búa við miðin geti ekki nýtt þau," segir Ólafur Áki Ragnarsson, bæjarstjóri Ölfuss, um uppsagnir tæplega 60 starfsmanna hjá einum stærsta vinnustað bæjarins, Humarvinnslunni í Þorlákshöfn. Að sögn forsvarsmanna fyrirtækisins var öllum í landvinnslu sagt upp vegna breyttra rekstrarskilyrða í kjölfar niðurskurðar á þorskkvóta.

27. september 2007 16:10