Það er ekkert gleðilegt á Eskifirði

"Það er ekkert gleðilegt hjá fyrirtækinu í dag. Það er alveg ljóst," segir Hrafnkell Hlöðversson, öryggistrúnaðarmaður hjá Eskju á Eskifirði, við Vísi en um 40 manns, öllu fólki í landvinnslu, var sagt upp störfum hjá fyrirtækinu í dag. Ástæða uppsagnanna er skortur á hráefni vegna niðurskurðar þorskkvóta.

Hrafnkell segir þó að uppsagnirnar hafi ekki komið starfsfólki algjörlega í opna skjöldu því búið hefði verið að vara fólk við fyrir sumarfrí. "Okkur var sagt að það gæti komið til uppsagna en það er auðvitað sárt þegar það gerist svo," segir Hrafnkell.

Hrafnkell er þakklátur fyrir álverið á Reyðarfirði sem muni væntanlega sjá hluta starfsfólksins fyrir vinnu. "Fólk er nú að fullu að leita sér að nýjum störfum og það gefur fólki aukna von um vinnu að álverið skuli vera hér í grenndinni," segir Hrafnkell.