Reiðarslag fyrir lítið byggðarlag eins og Þorlákshöfn

Aðspurður segir Ólafur Áki að hann geti varla sagt að uppsagnirnar komi á óvart. „Við vissum að víða um land gæti komið til aðgerða í kjölfar þess að þorskkvótinn var minnkaður," segir Ólafur. Hann bendir þó á að eigendur Humarvinnslunnar hyggist endurskipuleggja rekstur sinn en ekki loka fyrirtækinu og hætta. Eigendurnir þurfi ráðrúm til þess að skoða málin.

Ólafur Áki var á starfsmannafundinum í dag þar sem tilkynnt var um uppsagnirnar og segir hann að bæjaryfirvöld muni gera allt sem þau geti til þess að aðstoða þá sem misstu vinnuna. „Við höfum ráðið inn starfsmann til að aðstoða fólkið og fara yfir þeirra mál. Við munum skoða hvar fólkið geti hugsanlega fengið vinnu og koma á námskeiðum af einhverju tagi ef þörf er á," segir Ólafur Áki. Tveir þriðju starfsmanna Humarvinnslunnar eru útlendingar og telur Ólafur Áki að þeir muni þurfa á aðstoð að halda þar sem þeir viti ekki allir hvert á snúa sér. „Vonandi getum við aðstoðað fólk þannig að áhrifin á bæjarfélagið verði sem minnst."

Aðspurður segir Ólafur Áki að atvinnuástandið í bæjarfélaginu hafi verið mjög gott og það sé engin launung að bæjaryfirvöld hafi reynt að fjölga atvinnutækifærum og skjóta fleiri stoðum undir atvinnulífið. Bæði vatnsverksmiðja og einingaverksmiðja séu í byggingu en þær taki ekki til starfa fyrr en á næsta ári. Þá sé lengra í önnur verkefni.

Aðspurður um þær ákvarðanir ríkisstjórnarinnar að skerða kvóta um þriðjung segir Ólafur Áki að það sé lítið við þeim að segja. Ljóst sé að þorskstofninn sé á niðurleið samkvæmt rannsóknum Hafrannsóknarstofnunarinnar, en deilt hafi verið um þær. Menn hafi ekki betri ráðgjöf og hann sjái enga patentlausn í málinu.