Kristinn Jakobsson verður fjórði dómari á EM í fótbolta

Kristinn Jakobsson er einn átta dómara í Evrópu sem var valinn til að starfa sem fjórði dómari á leikjum úrslitakeppni Evrópumótsins í knattspyrnu næsta sumar.

Þetta kemur fram á heimasíðu UEFA í dag en Kristinn fékk símtalið í morgun. „Þetta er mikill heiður," sagði Kristinn við Vísi. „Það er eins og að jólin hafi komið aðeins fyrr þetta árið."

Kristinn segir að þetta sé skref upp á við fyrir sig. „Það er ekki spurning að þetta er mikil viðurkenning fyrir mig."

Hann segir að það sé vissulega gamall draumur sinn að starfa í kringum stórmót í knattspyrnu. „Þetta er auðvitað keppikefli allra dómara að komast í stóru keppnirnar og vonandi er ég með þessu að uppskera laun erfiðisins."

Kristinn hefur klifið metorðastigann hægt og rólega í dómgæslunni. „Ég byrjaði á úrslitakeppni U16 landsliða, svo U17, U19 og nú þetta. En þetta er vissulega stærra skref en ég átti von á."

Spurður hvort hann vonist til að verða einhverntímann valinn til að starfa sem aðaldómari á stórmóti segir hann að tíminn einn verði að leiða það í ljós.

„Ég á jafn mikið von á því og ég átti von á þessu. Það eru margir um hituna og sjálfsagt vildu margir hafa fengið það símtal sem ég fékk í morgun."

Kristinn má starfa sem alþjóðadómari í sjö ár í viðbót. „Ef guð og lukka leyfir mun ég klára þessi sjö ár. En næsti leikur getur líka breytt öllu, þannig er það nú bara."

Dómarar á EM 2008:

Aðaldómarar:

Konrad Plautz, Austurríki

Frank De Bleeckere, Belgíu

Howard Webb, Englandi

Herbert Fandel, Þýskalandi

Kyros Vassaras, Grikklandi

Roberto Rosetti, Ítalíu

Pieter Vink, Hollandi

Tom Henning Övrebö, Noregi

Lubos Michel, Slóvakíu

Manuel Enrique Mejuto Gonzalez, Spáni

Peter Fröjfeldt, Svíþjóð

Massimo Busacca, Sviss

Fjórði dómari:

Ivan Bebek, Króatíu

Stephane Lannoy, Frakklandi

Viktor Kassai, Ungverjalandi

Kristinn Jakobsson

Grzegorz Gilewski, Póllandi

Olegaria Benquerenca, Portúgal

Craig Thomson, Skotlandi

Damir Skomina, Slóveníu