McClaren finnur ekki fyrir aukinni pressu

Steve McClaren, landsliðsþjálfari Englendinga í knattspyrnu, segist ekki finna fyrir meiri þrýstingi en venjulega fyrir viðureign Englendinga og Ísraela í undankeppni EM á morgun. Leikurinn er afar þýðingarmikill fyrir enska liðið enda er það nú í þriðja sæti í E-riðli eftir að hafa aðeins gert jafntefli við Makedóna og tapað fyrir Króötum í síðustu tveimur leikjum. Aðeins tvö lið komast upp úr riðlinum.

Birt er viðtal við umboðsmanninn Pini Zahavi, góðan vin Svens Görans Erikssonar, fyrrverandi landsliðsþjálfara Englands, í nokkrum breskum miðlum í dag þar sem Zahavi telur að McClaren verði rekinn ef Englendingar tapa á morgun.

„Ég hef verið viðriðinn enska landsliðið í nokkurn tíma og við virðumst alltaf koma okkur í vandræði í undankeppnunum," sagði McClaren á fréttamannafundi í dag. „Aðalatriðið er að komast í úrslitakeppnina. Hæfileikarnir, gæðin og sjálfstraustið er fyrir hendi í liðinu og það þurfum við að hafa með okkur út á völlinn," sagði McClaren enn fremur um leikinn í Ísrael á morgun.

Töluvert hefur verið um meiðsli hjá enska landsliðinu ásamt því sem Ashley Cole, leikmaður Chelsea, er í leikbanni. Ætlar McClaren að bíða þar til eftir æfingu í dag með að tilkynna lið sitt en óvíst er hvort Micah Richards, varnarmaðurinn ungi, hafi jafnað sig af meiðslum sem hann hlaut í leik Manchester City og Middlesbrough um síðustu helgi.