380 milljarðar til samgöngumála á næstu 11 árum

Reiknað er með að rúmlega 380 milljörðum króna verði varið til samgöngumála á árabilinu 2007 til 2018 samkvæmt samgönguáætlun sem kynnt var í dag. Stærstur hluti þess rennur til vegamála, eða 85 prósent, en annað til flug- og siglingamála.

Eftir því sem fram kemur í samantekt á áætluninni frá samgönguráðuneytinu er fjármagninu dreift á þrjú fjögurra ára tímabil en það fyrsta nær frá árinu í ár til 2010. Þar er samtals gert ráð fyrir 104 milljörðum til vegamála.

Meðal verkefna sem ráðist verður í á fyrsta tímabilinu samkvæmt samgönguráætlun er bygging samgöngumiðstöðvar í Reykjavík og lenging flugbrauta á Akureyrarflugvelli og Egilsstaðaflugvelli. Þá á að verja 42 milljörðum til vegaframkvæmda á landsbyggðinni og um 37 milljörðum til framkvæmda á höfuðborgarsvæðinu. Þá verður tæpum 38 milljörðum ráðstafað til jarðganga.

Þá er gert ráð fyrir að afla kringum 45 milljarða króna með sérstakri fjármögnun og ráðstafa til ákveðinna verkefna, svo sem breikkun Hringvegarins út frá Reykjavík og framkvæmdum við Sundabraut.

Samgönguáætlunin gerir ráð fyrir að ráðast megi í nokkur viðamikil verkefni og þau fjármögnuð með sérstakri fjáröflun eins og einkaframkvæmd en þar má nefna samgöngumiðstöð í Reykjavík, átak í breikkun og endurbótum á aðalvegum út frá Reykjavík til austurs og norðurs og bygging og rekstur Bakkafjöruferju.

Í samgönguáætlun er jafnframt gert ráð fyrir að samgöngur verði í auknum mæli sjálfbærar með nýtingu umhverfisvænna orkugjafa. Áætlað er að notkun vistvæns eldsneytis verði um 20 prósent af heildarnotkun við lok áætlunarinnar. Þá fylgir umhverfismat nú í fyrsta sinn samgönguáætlun en þar er tekið mið af umhverfissjónarmiðum við gerð tillögu að samgönguáætlun, að áætlunin sé í samræmi við aðrar áætlanir og lög og alþjóðlega samninga.