Aragones ekki ánægður

Þrátt fyrir að Spánverjar hafi náð að halda í vonina á að komast áfram í lokakeppni EM með 2-1 sigri á Dönum í gærkvöldi var landsliðsþjálfarinn Luis Aragones ekki ánægður með frammistöðu lærisveina sinna. Aragones sagði sína menn hafa orðið alltof taugaveiklaða eftir að hafa náð forystu, en litlu munaði að 10 leikmenn Danmerkur næðu að jafna metin í síðari hálfleik.

"Við vorum með unga leikmenn í liðinu sem kunna ekki að nýta sér tveggja marka forskot. Á endanum vorum við stálheppnir með að sigra," sagði Aragones vondur í leikslok. Fernando Morientes og David Villa skoruðu glæsileg mörk í fyrri hálfleik en Michael Gravgaard minnkaði muninn í síðari hálfleik.

Danir léku manni færri frá 19. mínútu leiksins eftir að Niclas Jensen var rekinn útaf, en þrátt fyrir liðsmuninn áttu Danir ívið meira í leiknum ef eitthvað var.

"Þetta var gríðarlega mikilvægur leikur og það skipti öllu máli að sigra, en frammistaða okkar var ekki góð og við vorum heppnir að fá ekki á okkur annað mark undir lokin. Ég vona að við klúðrum ekki þeim áfanga sem við náðum með þessum sigri þegar við spilum við Íslendinga í á miðvikudag," sagði fyrirliðinn Iker Casillas.