Stjórnin ekki hrifin af skiptikerfinu

Athygli vakti að Bernd Schuster, þjálfari Real Madrid, stillti upp óbreyttu liði í gær frá því í 2-2 jafntefli gegn Lazio í Meistaradeildinni. Hann hafði áður gefið í skyn að fjórar til fimm breytingar yrðu gerðar á byrjunarliðinu.

Real Madrid lagði Recreativo Huelva 2-0 í gær. Schuster hefur hingað til alltaf gert talsverðar breytingar milli leikja og notast við skiptikerfi sem er ekki ósvipað því sem Rafael Benítez hefur verið að nota hjá Liverpool.

Stjórn Real Madrid er þó allt annað en hrifin af þessu kerfi og fer þar fremstur í flokki yfirmaður knattspyrnumála hjá félaginu, Predrag Mijatovic. Sá ágæti maður bað Schuster um að leggja kerfið til hliðar, allavega í þetta sinn.

Schuster ákvað að verða að ósk stjórnarmanna og nú verður spennandi að sjá hvert framhaldið verði á þessu skiptikerfi hans eftir sigurinn í gær.