Spánverjar á EM eftir sigur á Svíum

Spánverjar tryggðu sér í kvöld sæti í úrslitakeppni EM 2008 með 3-0 sigri á Svíþjóð Santiago Bernabeu-vellinum í Madríd.

Capdevila kom Spáni yfir snemma leiks og Andrés Iniesta bætti um betur á 39. mínútu. Sergio Ramos skoraði svo þriðja markið þegar tuttugu mínútur voru liðnar af síðari hálfleik.

Sigurinn var afar öruggur en Spánverjar léku mjög vel í kvöld. Svíar standa engu að síður vel að vígi fyrir lokaumferðina en þeir þurfa að vinna Letta á heimavelli á miðvikudaginn kemur til að tryggja sæti sitt í úrslitakeppninni í Austurríki og Sviss á næsta ári.

Spánverjar mæta Norður-Írum á heimavelli á miðvikudaginn en þeir síðarnefndu þurfa að vinna þann leik og treysta á að Svíar tapi fyrir Lettum til að komast áfram á kostnað Svía.

Danir eru endanlega úr leik eftir að þeir töpuðu fyrir Norður-Írum í Belfast í kvöld.

Þá unnu Lettar lið Liechtenstein á heimavelli í kvöld, 4-1, í sama riðli. Ísland mætir Dönum á miðvikudaginn kemur í lokaumferð riðilsins.