Pólland, Króatía og Holland á EM

Þrjú lið hafa bæst í þann hóp liða sem hafa tryggt sér sæti á EM í Austurríki og Sviss á næsta ári. Aðeins eru fjögur sæti nú laus.

Króatía tryggði sig áfram í dag þrátt fyrir 2-0 tap fyrir Makedóníu á útivelli. Um miðjan leik var ljóst að Ísraelar hefðu unnið Rússa sem þýddi að Króatía var komið áfram, sama hver úrslit leiksins yrðu.

Króatar slökuðu þá vel á og Makedónar skoruðu tvö mörk undir lok leiksins.

Hollendingar unnu nauman sigur á grönnum sínum í Lúxemborg, 1-0, en það dugði til að tryggja liðinu sæti á EM. Búlgaría var einnig í séns í dag en 1-0 sigur liðsins á Rúmeníu í dag dugði ekki til.

Þá sýndu Pólverjar að þeir eru með eitt besta landslið Evrópu með 2-0 sigri á Belgum á heimavelli. Liðið er öruggt áfram og verður fagnað sjálfsagt vel fram á nótt í Póllandi sem og í öðrum löndum víða um Evrópu.