Stefán Gíslason: Danirnir ekki eins montnir og áður

Stefán Gíslason, leikmaður Bröndby í dönsku deildinni, segir Dani ekki vera eins montna af landsliðinu sínu og oft áður.

"Þeim hefur ekki gengið það vel og það hefur því aðeins dregið af þeim. Þeir eru samt það ánægðir með sig þannig að þeir reikna ekki með að þessi leikur verði neitt alltof erfiður. Það er búin að vera hörð gagnrýni á danska liðið og ég myndi segja að þeir væru hálf vængbrotnir," segir Stefán á blaðamannafundi sem haldinn var í dag.

Stefán snýr nú aftur í landsliðið eftir fimm mánaða fjarveru en Eyjólfur Sverrisson tók hann út úr landsliðinu eftir heimaleikinn á móti Liechtenstein.

"Ég verð að segja að þetta séu búnar að vera öðruvísi æfingar," sagðí Stefán Gíslason, aðspurður um hvort að æfingarnar hjá Ólafi væru ólíkar þeim sem voru hjá Eyjólfi.

"Það er búið að vera flott tempó á æfingunum. Þetta er stuttar og góðar æfingar. Við erum líka búnir að æfa meira og erum því ekki bara búnir að hanga upp á hóteli og éta og sofa. Þetta eru búnar að vera mjög góðar æfingar og maður er í góðu standi og klár í þennan leik," segir Stefán sem er líklegur til að byrja inn á í leiknum í kvöld.