Tvennt flutt á sjúkrahús eftir árekstur jeppa í Grímsnesi

Tvennt var flutt á sjúkrahús í Reykjavík eftir að tveir jeppar sem komu úr gangstæðri átt rákust saman á Biskupstungnabraut sunnan við Borg í Grímsnesi um hálfsexleytið í dag. Að sögn lögreglu voru fimm í öðrum jeppanum og þrír í hinum og mun hluti hópsins leitað sjálfur til læknis til skoðunar.

Þær upplýsingar fengust hjá vakthafandi lækni á slysadeild Landspítalans að fólkið sem flutt var með sjúkrabíl til Reykjavíkur væri í rannsókn en það virtist ekki alvarlega slasað.

Lögregla á Selfossi segir sjö umferðaróhöpp hafa orðið í hálkunni í dag en í flestum tilvikum hefur verið um að ræða bíla sem runnið hafa út af veginum. Bendir lögregla á að margir aki Suðurlandsveginn sem sé saltaður en kom svo inn á uppsveitavegi sem séu það ekki og þá sé hætta á slysum. Vill hún hvetja fólk til þess að aka varlega í hálkunni.