Engar sérstakar ráðstafanir hér á landi vegna fuglaflensu í Suffolk

Halldór Runólfsson yfirdýralæknir segir að ekki verði gripið til neinna sérstakra ráðstafana hér á landi vegna frétta af því að fuglaflensa af H5N1-stofni hafi greinst á bóndabýli í Suffolk í Englandi.

Um 2500 kalkúnar á bænum hafa drepist af völdum veirunnar og verður öllum kalkúnum þar, um 160 þúsund dýrum, slátrað til þess að koma í veg fyrir að flensan berist í aðra fugla eða menn.

Halldór segir að það sé betra að fuglaflensan greinist í alifuglum því það sé viðráðanlegra en þegar hún greinist í farfuglum. Flensan greinist nú á svæði þar sem farfuglar hafi litla viðkomu og þar að auki séu engir farfuglar komnir hingað til lands.

Halldór segir að fylgst verði með þróun mála og mun sérfræðingahópur landbúnaðarráðuneytisins vegna fuglaflensunnar hittast á fundi á mánudag.