Íslendingar töpuðu fyrir Spánverjum - enduðu í áttunda sæti

Íslendingar enduðu í áttunda sæti á heimsmeistaramótinu í handknattleik sem fram fer í Þýskalandi en liðið tapaði fyrir Spánverjum í dag, 40-36. Staðan í leikhléi var 19-13 fyrir Spánverja og tókst íslenska liðinu aldrei að vinna upp forystu sem Spánverjar náðu um miðbik fyrri hálfleiks. Niðurstaðan þýðir væntanlega að Ísland leikur ekki um sæti á Ólympíuleikunum í Peking á næsta ári.

Ólafur Stefánsson og Guðjón Valur Sigurðsson voru markahæstir í íslenska liðinu með átta mörk en Snorri Steinn Guðjónsson, Logi Geirsson og Alexander Petterson skoruðu fimm mörk hver. Róbert Gunnarsson og Vignir Svavarsson skoruðu tvö mörk hvor og Arnór Atlason eitt.