Sjórinn var svolítið kaldur

Þrjátíu manna hópur sundfólks synti út í Viðey í gær. Margir létu staðar numið í Viðey og komu með bát til baka en nokkrir syntu báðar leiðir.

Hálfdán Örnólfsson og Heimir Örn Sveinsson syntu báðar leiðir og voru fyrstir til baka. Sundið tók þá aðeins um hálftíma, en þeir komu í land talsvert á undan næsta fólki. „Hann var svolítið kaldur,“ sögðu þeir. „Þetta eru um það bil tveir kílómetrar og útfallið við eyjuna er talsvert.“

Hálfdán og Heimir eru báðir vanir sjósundmenn. „Við höfum synt saman út í Skrúð, Hvalfjörðinn og svo aðstoðaði ég Benedikt Hjartarson í Ermarsundssundinu hans,“ segir Heimir.

Það var Benedikt Hjartarson sem skipulagði hópsundið. „Þetta er draumur allra sem eru í þessu, hér er samankomið fólk sem hefur misjafna getu og kunnáttu,“ segir hann. Bátur fylgdi sundfólkinu ef einhver hefði þurft á aðstoð að halda, en á það reyndi ekki. Benedikt segir vegalengdina ekkert mjög langa en það að synda í Viðey þyki merkilegt.