Ótvíræð krafa um sigur Svía gegn Íslandi

Það er mikil ólga í Svíþjóð þessa dagana vegna skandalsins í leik Dana og Svía um helgina. Þá hljóp dönsk bulla inn á völlinn og réðst að dómara leiksins. Í kjölfarið var leikurinn blásinn af og Svíum dæmdur sigur, 3-0.

Það er því erfitt fyrir Svía að gleyma þessum leik og einbeita sér að þeim næsta, gegn Íslandi á morgun. Anders Sandquist, blaðamaður Expressen, tekur undir þetta.

„Það er erfitt að ætla einfaldlega að gleyma Danaleiknum og öllu sem honum fylgdi. Knattspyrnusamband Evrópu mun ekki taka endanlega ákvörðun um úrslit leiksins fyrr en á föstudag og því mun þetta mál hanga yfir mönnum alla þessa vikuna,“ sagði Sandquist.

Hann segir þó að krafa almennings og fjölmiðla í Svíþjóð sé sigur gegn Íslandi og ekkert annað. „Sigur í leiknum gæti tryggt okkur umspilssæti um sæti á EM 2008 og þar sem Ísland hefur að engu að keppa og vantar þar að auki sinn sterkasta leikmann er búist við öruggum sigri. Ef þetta væri fyrsti leikur keppninnar væri kannski búist við erfiðum leik.“

Sandquist segir þó að fjarvera Eiðs Smára Guðjohnsen landsliðsþjálfara sem verður í banni í leiknum gæti haft jákvæð áhrif á aðra leikmenn liðsins. „Mér sýnist oft að aðrir leikmenn bíði eftir því að hann geri eitthvað og spili þess vegna ekki jafn vel. Það gæti nú breyst.“

Sandquist segir þó að Lars Lagerbäck landsliðsþjálfari (á mynd) vari við vanmati. „Hann bendir á að Ísland tapi aldrei stórt og að oft gangi liðinu illa með veikari andstæðinga. Spánn skoraði seint gegn Íslandi á heimavelli og minntist Lagerbäck á það. Leikmenn tóku í svipaðan streng.“

Sænska landsliðið æfði ekki í gær eins og áætlað var þar sem Lagerback tók þá ákörðun að sínir menn þyrftu á hvíldinni að halda eftir mikinn baráttuleik á móti Dönum á laugardaginn. “Það sem Danaleikurinn reyndi mikið á liðið ákvað ég að liðið færi bara á töflufund og mínir menn fengju tækifæri til þess að hlaða batterín,” sagði Lagerback í viðtali við sænska blaðið Aftonbladet. Það er mikið um meiðsli í sænska liðinu en ekki er þó búist við öðru en að allir lykilmenn sænska liðsins verði með.