Það er ekki hægt að spila betur

Lítið annað kemst að í sænskum íþróttamiðlum í dag en tilnefningar FIFA í valinu á knattspyrnumanni ársins. Svíar eru mjög ósáttir við að framherjinn Zlatan Ibrahimovic skuli ekki vera tilnefndur, en hann hefur farið hamförum með Inter að undanförnu.

Lars Lagerbäck, landsliðsþjálfari Svía, tekur undir þessa gagnrýni á FIFA. "Zlatan á að vera inni á topp tíu því það er einfaldlega ekki hægt að spila betur en hann hefur gert að undanförnu. Hann er að mínu mati inni á topp tíu í heiminum og því ætti að vera sjálfssagt að hann væri inn á topp 30," sagði landsliðsþjálfarinn.