Terry klár gegn Króötum?

Svo gæti farið að John Terry sneri óvænt aftur í enska landsliðið fyrir leikinn mikilvæga gegn Króötum á miðvikudaginn, en hann hefur ekki spilað síðan í síðasta mánuði vegna meiðsla.

Bresku blöðin fullyrða sum hver að Terry hafi náð fullri heilsu og verði því í byrjunarliðinu í leiknum mikilvæga á miðvikudagskvöldið. Hann er sagður hafa blessun stjóra síns Avram Grant hjá Chelsea til að spila ef hann treysti sér til.

Enska liðinu veitir ekki af reynslubolta í byrjunarliðið í ljósi þess að þeir Rio Ferdinand, Ashley Cole og Gary Neville geta ekki spilað leikinn vegna meiðsla og leikbanna.