Sharon enn í lífshættu

Ariel Sharon, forsætisráðherra Ísraels, fékk annað heilablóðfall í gærkvöld, mun alvarlegra en það sem hann fékk þann 18. desember síðastliðinn. Læknar segja batahorfur hans ekki vera góðar þó tekist hafi að stöðva blæðingar í heila. Samkvæmt CNN lamaðist Sharon í neðri hluta líkamans og er hann nú í öndunarvél. Sharon átti að gangast undir aðgerð í dag vegna gats sem fannst á hjarta hans eftir fyrra heilablóðfallið.

Aðstoðarforsætisráðherra Ísrael, Ehud Olmert, hefur tekið við völdum sem forsætisráðherra. Boðað hefur verið til þingkosninga þann 28. mars í Ísrael og býður Sharon, sem er 77 ára gamall sig fram til endurkjörs sem forsætisráðherra, nú fyrir Kadima flokkinn, sem hann stofnaði eftir að hann sagði sig úr Likudflokknum nýlega. Kadima var spáð sigri en dagar Sharons í stjórnmálum eru þó að öllum líkindum taldir.