Viktoríuvatn að hverfa

Stærsta stöðuvatn Afríku gæti þornað upp á næstu áratugum ef fram heldur sem horfir. Vatnsborð Viktoríuvatns hefur ekki verið lægra í heil áttatíu ár.

Þetta kemur fram í skýrslu sem verður gerð opinber í maí. Á aðeins tveimur árum hefur vatnsmagnið minnkað um allt að fimmtung og allt útlit fyrir að þessi þróun haldi áfram ef ekki verður gripið til aðgerða strax. Vatnið nær inn fyrir landamæri þriggja landa, Úganda, Tansaníu og Kenýu og um þrjatíu milljónir manna njóta góðs af því.

Tvær risastórar stíflur eru við vatnið inni í Úganda, þar sem það er notað til framleiðslu rafmagns. Stjórnvöld í landinu eru sökuð um að hafa farið langt fram úr þeim takmörkunum sem hafa verið settar um notkun vatnsins. Ráðamenn þar neita því og segja mikla þurrka í austur-Afríku einu orsökina fyrir vatnstapinu.

Hver svo sem ástæðan kann að vera, er ljóst að þróunin er ekkert grín og vísindamenn óttast að ef fram haldi sem horfi séu náttúruhamfarir í aðsigi á svæðinu við Viktoríuvatn.