Heimsmarkaðsverð á hráolíu þrefaldast á 4 árum

Heimsmarkaðsverð á hráolíu hefur þrefaldast á fjórum árum. Olíumálaráðherra Írans segist ánægður með þessa þróun.

Verðið á hráolíu rauk upp þriðja daginn í röð í gær. Tunnan fór um tíma yfir 74 dollara og við lokun markaða var verðið á tunnu rösklega 73 dollarar. Kjarnorkudeila Írana er talinn stærsti þátturinn í þessari þróun, en auk þess hefur framleiðsla dregist nokkuð saman í Nígeríu, Mexíkó og Írak.

Olíumálaráðherra Írans sagðist í morgun afar ánægður með þessa þróun, enda væri alltaf gott fyrir framleiðanda vöru að eftirspurnin væri mikil. Það væri enginn skortur á olíu í Íran, heldur væru það bara Bandaríkjamenn sem börmuðu sér yfir olíuskorti og þess vegna væri heimsmarkaðsverðið stöðugt á uppleið.

Olíuverð í heiminum hefur þrefaldast síðan 2002 og allt bendir til að það haldi áfram að hækka. Sérfræðingar óttast að með sama áframhaldi muni verðið fljótlega ná toppnum frá upphafi níunda áratugarins, þegar verðið fór yfir 80 dollara á tunnu.