20 dauðir fuglar finnast í Oskarshamn

Tuttugu dauðir fuglar fundust í gær við kjarnorkuverið í Oskarshamn í Suður-Svíþjóð. Óttast er að fuglaflensa hafi orðið þeim að bráð.

Á þriðjudaginn fundust endur á sama svæði, sem taldar eru hafa drepist úr hinum banvæna H5N1-stofni fuglaflensunnar. Það hefur þó ekki enn fengist staðfest.

Fuglarnir sem fundust dauðir við kjarnorkuverið í gær hafa verið sendir til rannsóknar. Ekki hefur verið gefið upp um hvers konar fugla er að ræða, en þó er vitað að þeir eru af fleiri en einni tegund.

Stjórnvöld í Svíþjóð hafa aukið eftirlit á svæðinu og hyggjast nú fela strandgæslunni að að leita að dauðum fuglum með fram ströndum landsins. Í gær var mikið frost á svæðinu og leitinni var hætt tímabundið. Á meðan leitin stendur yfir verður hluti svæðisins alveg lokaður af.

Heilbrigðisyfirvöld í Svíþjóð reyna þó allt hvað af tekur að koma í veg fyrir of mikla hræðslu meðal almenning. Segja fyrst og fremst verið að koma í veg fyrir að flensan dreifist meðal alifugla, en mönnum sé ekki hætta búin.

Engu að síður eru íbúar í nágrenni kjarnorkuversins margir óttaslegnir og sumir þora hvorki að gefa börnum né gæludýrum lausan tauminn, af ótta við að þau fari að fikta í jörðinni og nái sér í veiruna hættulegu.