Vígamenn á ferli í Bagdad

Vígamenn í Írak víla nú ekki fyrir sér að ráðast á hverfi þar í landi sem hingað til hafa verið friðhelg. Mikil spenna er í landinu og mannfall hefur verið töluvert hvern dag síðan ein helgasta moska sjía-múslima í Írak var sprengd í loft upp í síðustu viku. Minnst 13 féllu í árásum í höfuðborginni í morgun og undir hádegi var gerð árás á bílalest Adnas al-Dulaimi, helsta leiðtoga súnnía í Írak.

Byssumenn skutu á bíl al-Dulaimis í morgun. Súnní leiðtoginn hafði sjálfur stigið út úr brynvarinni glæsibifreið sinni skömmu áður en sprungið hafði á bílnum. Einn lífvörður al-Dulaimis lést í árásinni og þrír særðust. Al-Dulaimi hvetur stuðningsmenn sína til að halda ró sinni og grípa ekki til aðgerða sem geti aukið á ófriðarbálið sem hefur logað síðan ein helgasta moska sjía-múslima í Írak var sprengd í loft upp í síðustu viku. Mörg hundruð Írakar hafa fallið í átökum síðan þá.

Tvær sprengjuárásir í Bagdad hafa kostað minnst þrettán manns lífið. Að minnsta kosti 8 féllu og 14 særðust þegar sprengja sprakk nálægt markaði í suð-austurhluta Bagdad í morgun. Meðal þeirra sem létu lífið voru barn og 2 konur.

Skömmu síðar létu minnst 5 létu lífið og 8 særðust þegar önnur sprengja sprakk í strætisvagni í Sadr-borg, fátækrahverfi í norð-austurhluta Bagdad í morgun. Hverfið er vígi herskáa sjía-klerksins Moqtada al-Sadr. Vígamenn hliðhollir al-Sadr hafa vaktað götur hverfisins um nokkurt skeið og því hefur verið lítið um ofbeldisverk þar þar til í morgun.