Barn og tvær konur meðal látinna

Að minnsta kosti 8 létu lífið og 14 særðust þegar vegsprengja sprakk nálægt markaði í suð-austurhluta Bagdad, höfuðborg Íraks, í morgun. Meðal þeirra sem létu lífð voru barn og tvær konur. Lögregla rýmdi markaði eftir að önnur sprengja fannst þar skömmu síðar. Hún var þegar gerð óvirk.

Að minnsta kosti 5 létu lífið og 8 særðust þegar önnur sprengja sprakk í strætisvagni í Sadr-borg, fátækrahverfi í norð-austurhluta Bagdad í morgun. Hverfið er vígi herskáa sjía-klerksins Moqtada al-Sadr.

Hann hefur hvatt súnní- og sjía-múslima til að sýna samstöðu í baráttu sinni við bandaríska herliðið í landinu. Vígamenn tryggir al-Sadr hafa vaktað götur hverfisins um nokkurt skeið og því hefur verið lítið um ofbeldisverk þar.