Óvíst hverjir fá meirihluta í ítölsku þingkosningunum

Allt stefni í hörkuspennandi lokasprett í ítölsku þingkosningunum en fyrstu tölur benda til þess að stjórn Silvio Berlusconis, forsætisráðherra, haldi naumum meirihluta í báðum deildum þingsins. Fyrr í dag bentu útgönguspár til þess að stjórnin væri fallin og bandalag vinstri flokkana, með Romano Prodi í broddi fylkingar, hefði náð meirihluta.

Það var um klukkan eitt í dag að íslenskum tíma sem fyrstu útgönguspár voru birtar og samkvæmt þeim var ólívubandalag Romano Prodis með nauma forystu á hægri fylkingu Berlusconis, forsætisráðherra, eða 49% atkvæða á móti 45%. Þar með virtist sitjandi stjórn fallin.

Samkvæmt upplýsingu af vefsíðu ítalska blaðsins Republica nú á áttunda tímanum er búið að telja um þriðjug greiddra atkvæða í neðri deild og bandalag Prodis hefur 49,5% atkvæða en hægri bandalag Berlusconis forsætisráðherra 50%.

Í efri deild er búið að telja atkvæði í rúmlega 78% kjördæma og hefur bandalag Prodis 49,8% atkvæða og 151 þingsæti en stjórnarflokkarnir 49,1% atkvæða og 158 þingsæti. Mjórra gæti því varla verið á mununum.

Samkvæmt upplýsingum frá innanríkisráðuneytinu var kjörsókn um 85%, nokkur meiri á Norður-Ítalíu en í suðurhluta landsins. Minnst var hún á Sikiley og Sardiníu. Talið er að myndun nýrrar ríkisstjórnar verði að bíða fram yfir forsetakosningar í næsta mánuði.