Hluti ránsfengsins fundinn.

Líklegt er að breska lörgrelan hafi í gær fundið hluta ránsfengs úr þaulskipulögðu ráni sem framið var í fjárhirslu í bænum Tonbridge í Bretlandi í vikunni.

Talið er að ræningjarnir hafi komist undan með jafnvirði allt að sex milljarða íslenskra króna og er ránið sagt það langstærsta í sögu Bretlands.

Hvítur sendibíll fannst nálægt lestarstöð rétt fyrir utan Tonbridge og samkvæmt upplýsingum frá lögreglu var töluvert af peningum í bílnum en ekki hefur fengist upp gefið hve mikið. Tæknimenn lögreglu rannsaka nú bílinn.

Þrjú eru í haldi lögreglu vegna málsins, einn karlmaður um þrítugt og tvær konur á fertugs og fimmtugsaldri. Rúmlega tvö hundruð milljónum króna hefur verið heitið fyrir upplýsingar sem leitt geta til handtöku ræningjanna.