Síbrotamenn í umferðinni

Lögreglan í Reykjavík hafði afskipti af allmörgum ökumönnum á síðasta sólarhring vegna umferðarlagabrota. Flestir voru teknir fyrir hraðakstur en nær allir þeirra hafa áður verið sektaðir fyrir að keyra of geyst.

Þá stöðvaði lögreglan för þriggja ökumanna sem allir eiga það sameiginlegt að vera sviptir ökuréttindum. Þrátt fyrir prófleysið eru þeir enn á ferðinni í umferðinni. Þá voru tveir ökumenn teknir fyrir að aka gegn rauðu ljósi í gær. Hinir sömu hafa heldur ekki hreinan skjöld í umferðinni. Segir á vef lögreglunnar að ljóst sé að margir ökumenn verði að líta í eigin barm og hugsa sinn gang.