Einsdæmi að púað sé fyrir flutning lags

Fjöldi áhorfenda púaði og baulaði á Silvíu Nótt áður en hún hóf að flytja lag Íslendinga í undankeppni Eurovision í Ólympíuhöllinni í Grikklandi í gærkvöldi, sem mun vera einsdæmi í sögu keppninnar.

Hins vegar var einu sinni púað á breskar stúlkur eftir flutning, snemma á níunda áratugnum, þegar í ljós kom að þær höfðu flutt stolið lag og ekki einu sinni sungið það sjálfar.

Þetta er samkvæmt heimildum Páls Óskars Hjálmtýssonar, eftir að hann hafði flett upp í alfræðibók um keppnina. Eftir flutning Silvíu var líka púað en einnig mátti með góðum vilja greina fagnaðar hróp. Lagið komst ekki áfram í aðalkeppnina og ekki liggur fyrir hversu mörg eða fá atkvæði það hlaut í undankeppninni.

Þrátt fyrir það söfnuðust íslenskir aðdáendur Silvíu víða saman í gær, bæði á heimilum og á veitingahúsum, og fylgdust spenntir með. Hvað sem sumir segja um áhugaleysi á Eurovision-keppninni, þá voru götur á höfuðborgarsvæðinu nánast auðar, eins og um miðja nótt væri, meðan á keppninni stóð.