Varar við innrás í Íran

Ali Khamenei erkiklerkur í Íran varaði Bandaríkjamenn við að ráðast inn í landið í ræðu sem hann flutti á þingi íranskra verkamanna í dag.

Í ávarpinu minnti Khamenei á að Íranar væru friðelskandi þjóð og hefðu aldrei ráðist gegn öðrum ríkjum. Ef á þá yrði hins vegar ráðist áskildu þeir allan rétt til að svara til baka í sömu mynt. Bandaríkjamenn gruna Írana um að ætla að koma sér upp kjarnavopnum og útiloka ekki að beita þá hervaldi, láti þeir ekki af áformum sínum um auðgun úrans þegar í stað.