Óttast ekki refisaðgerðir

Ahmadinejad, Íransforseti, gaf í dag í skyna að til greina að Íranar segi sig úr Alþjóða kjarnorkumálastofnuninni ef aðild að henni geri ekkert gagn. Stofnunin vísaði kjarnorkudeilunni til Öryggisráðs Sameinuðu þjóðanna í síðasta mánuði. Íranar hafa frest fram á föstudag til að hætta auðgun úrans.

Ahmadinejad, Íransforseti, hefur ítrekað vísað á bug ásökunum um að Íranar ætli sér að þróa kjarnorkuvopn. Hann hefur sagt að kjarnorkan verði einungis notuð í friðsömum tilgangi. Forsetinn sagði á blaðamannafundi í Teheran í dag að áhyggjur alþjóðasamfélagsins væru hlægilegar. Hann bætti því við að hann ætti alls ekki von á því að refsiaðgerðum yrði beitt að föstudegi liðnum líkt og Bandaríkjamenn vilji.

Bandaríkjamenn og Bretar hafa þrýst á að refsiaðgerðum verði beitt og hafa reynt að fá slíkar aðgerðir samþykktar áður en frestur Öryggisráðsins er liðinn. Því hafa Kínverjar og Rússar mótmælt og viljað bíða skýrslu Alþjóða kjarnorkumálastofnunarinnar.

Þrjár stærstu fréttastofur Rússlands höfðu í dag eftir heimildarmanni í Kreml að stjórnvöld í Moskvu væru alfarið andvíg því að Íranar þróuðu tækni sem gerði þeim það mögulegt að framleiða kjarnorkuvopn. Rússar teldu þó ýmsar leiðir að því takmarki og þeir væru ósammála Bandaríkjamönnum þegar kæmi að því að velja aðferð til að fá Írana til að hverfa frá áætlunum sínum.