Góð kosningaþátttaka í Ungverjalandi

Allgóð kjörsókn hefur verið í síðari umferð ungversku þingkosninganna sem hófst í morgun. Útlit er fyrir að ríkisstjórnin haldi meirihluta sínum. Þegar kjörstaðir voru opnaðir snemma í morgun höfðu þegar myndast biðraðir fyrir utan og það sem af er degi hefur kjörsókn verið býsna góð. Stöðugleiki hefur hingað til ekki verið helsta einkenni ungverskra stjórnmála því síðan járntjaldið féll árið 1990 hefur sitjandi ríkisstjórn aldrei náð að halda völdum.

Nú stefnir hins vegar í að kjósendur ætli að veita jafnaðarmannastjórn Ferencs Gjúrskanís áframhaldandi brautargengi. Hún hafði nauman meirihluta eftir fyrri umferð þingkosninganna fyrir hálfum mánuði og skoðanakannanir sem gerðar voru fyrir helgi benda til að stjórnarflokkarnir fái í það heila 208 þingsæti af 386, eða 53 prósent þeirra. Ólíklegt er talið að hægriflokknum Fidesz sem Viktors Urbans fyrrverandi forsætisráðherra leiðir takist að velgja jafnaðarmönnum undir uggum. Átök um efnahagsmál hafa einkennt kosningabaráttuna öðru fremur en hvergi í Evrópusambandinu er fjárlagahalli jafn mikill og í Ungverjalandi, eða um átta prósent af landsframleiðslunni. Takist ekki að koma böndum á hann er nánast útilokað að Ungverjar geti tekið upp evruna árið 2010 eins og þeir stefna að.