Bin Laden segir Vesturlönd í krossför gegn islam

Arabíska sjónvarpsstöðin al-Jazeera birti í morgun ávarp frá Osama bin Laden, leiðtoga al-Kaída hryðjuverkanetsins. Í ávarpinu sagði hann tilraunir ríkisstjórna á Vesturlöndum til að einangra Hamas-samtökin og átökin í Darfur dæmi um krossför Vesturlanda gegn íslam. Bin Laden bætti því við að almenningur á Vesturlöndum bæri einnig ábyrgð á þessari aðför gegn trú sinni.

Síðast ávarpaði bin Laden fylgismenn sína í janúar á þessu ári en þá hét hann áframhaldandi árásum á Bandaríkin. Hann kvaðst þó til viðræðu um vopnahlé gegn ákveðnum skilyrðum.