Rekin frá CIA vegna uppljóstrana

Bandaríska stórblaðið Washington Post var á meðal þeirra fyrstu sem greindu frá því síðastliðið haust að bandaríska leyniþjónustan CIA starfrækti leynifangelsi í yfirgefnum herstöðvum í Austur-Evrópu og stundaði umfangsmikla fangaflutninga í tengslum við þau, meðal annars um íslenska lofthelgi. Á sínum tíma hét Porter Goss, forstjóri CIA, því að draga þá sem lekið hefðu upplýsingum í fjölmiðla til ábyrgðar enda hefðu uppljóstranirnar valdið verulegum skaða.

Í gær sendi CIA frá sér yfirlýsingu þar sem greint var frá því að hátt settum starfsmanni stofnunarinnar hefði verið vikið úr starfi eftir að hafa viðurkennt að hafa átt í óeðlilegum samskiptum við blaðamenn. Áður hafði hann fallið ítrekað á lygaprófi. Nafnið hefur ekki fengist uppgefið en fjölmiðlar vestra álíta að um sé að ræða konu að nafni Mary McCarthy og hafa heimildarmenn þeirra staðfest það. Í yfirlýsingu CIA er ekki sérstaklega nefnt hvaða fjölmiðla McCarthy á að hafa rætt við en talið er að Dana Priest, blaðamaður Washington Post, sé þar á meðal en í vikunni hreppti hún hin virtu Pulitzer-verðlaun fyrir skrif sín um málið