Gyanendra vill sættir

Ekkert útlit er fyrir að ólgunni í Nepal linni á næstunni þrátt fyrir að konungur landsins hafi heitið því í dag að koma á lýðræði þar á ný. Stærsti flokkur landsins segir sáttatilboð kóngsins ganga alltof skammt og því verði mótmælum haldið áfram.

Rúmt ár er síðan Gyanendra, konungur Nepals, tók sér alræðisvald í ríki sínu, að eigin sögn til að auðvelda baráttuna við herskáa Maóista. Ákvörðunin hefur frá upphafi mælst illa fyrir hjá íbúum landsins og undanfarnar tvær vikur hefur samfélagið farið algerlega úr skorðum vegna víðtækra mótmæla. Yfirvöld hafa brugðist við af mikilli hörku og þannig hafa fjórtán andófsmenn fallið fyrir byssukúlum hersins. Þrátt fyrir útgöngubann og hótanir stjórnvalda um að áfram yrði skotið á mótmælendur fylkti á annað hundrað þúsund manns liði í höfuðborginni Katmandú í dag og krafðist lýðræðisumbóta. Aðgerðirnar virðast hafa skilað árangri því undir kvöld ávarpaði konungurinn þegna sína. Í ávarpinu bauð hann stjórnarandstöðunni að útnefna forsætisráðherra svo setja mætti á fót ríkisstjórn.

Þar sem konungur minntist ekkert á stjórnarskrárbreytingar í ávarpinu var stærsti stjórnmálaflokkur landsins ekki lengi að slá á þessa útréttu sáttahönd. Talsmaður hans sagði í samtali við Reuters-fréttastofuna að tillögurnar væru bæði óljósar og ófullnægjandi og því yrði mótmælunum haldið áfram sem aldrei fyrr.