Deilt um skipan þingforseta á Ítalíu

Hveitibrauðsdagar sigurvegara þingkosninganna á Ítalíu urðu töluvert færri en búist var við. Brestir eru komnir í Ólívubandalag mið- og vinstri flokka, sem staðfest var í vikunni að náð hefði naumum meirihluta í báðum deildum þings.

Það eru rétt um tveir sólahringar liðnir frá því hæstiréttur á Ítalíu staðfesti sigur olívubandalags Romanos Prodis sem hafði þar með fellt ríkisstjórn Silvios Berlusconis.

Deilt er um hverja eigi að skipa þingforseta í neðri- og efri deild. Fyrir kosningar sögðu andstæðingar Prodis að honum myndi reynast erfitt að halda saman þessu breiða flokkabandalagi en að því standa meðal annars hófsamir kaþólikkar og gallharðir kommúnistar. Engin átti þó von á deilum áður en Prodi tæki við völdum.

Prodi sagði á dag að hann væri að vinna að lausn deilunnar og bætti við að fulltrúar allra flokka bandalagsins segðust samþykkja val hans. Nýtt þing kemur saman eftir viku. Þá kemur að því að velja nýja forseta landsins sem kemur til með að veita formlegt stjórnarmyndunarumboð.

Silvio Berlusconi hefur enn ekki viðurkennt ósigur sinn og segja stjórnmálaskýrendur að hann bindi vonir sínar við að olíuvubandalagið leyist í frumeindir sínar áður en nýtt þing kemur saman eftir viku. Einnig mun hann vonast til að tveggja þingsæta meirihluti olívubandalagsins í efri deild falli innan skamms.