Hjálparstarf í Darfúr héraði í hættu

Hjálparstarfið í Darfúr-héraði í Afríkuríkinu Súdan gæti svo gott sem hrunið innan fárra vikna, ef ekki fæst meira fjármagn til hjálparstarfa. Þetta segir Jan Egeland, æðsti yfirmaður mannúðarstarfs hjá Sameinuðu þjóðunum, en hann ræddi stöðu mála í öryggisráði samtakanna í gær. Egeland segir einnig nauðsynlegt að fjölga friðargæsluliðum í héraðinu og að súdönsk stjórnvöld auðveldi hjálparstarfsmönnum sem eru í landinu að vinna sín störf, en þau hafa meðal annars tafið það að veita þeim inngöngu í landið. Tugþúsundir hafa látist og tvær milljónir hafa þurft að yfirgefa heimili sín vegna átaka í Darfúr-héraði sem staðið hafa í þrjú ár. Að sögn Egelands hefur ástandið farið stigversnandi þau tvö ár sem hann hefur starfað í Darfúr. Aðeins eitt ríki, Bretland, hefur ákveðið að veita meira fé í hjálparstarfið í héraðinu í ár en í fyrra.