Mótmælendur láta í sér heyra í Washington

Falun Gong-liðar komust í dag nær Kínaforseta í Bandaríkjunum heldur en þegar forseti landsins kom til Íslands árið 2002. Einn mótmælenda náði að setja fund forseta Kína og Bandaríkjanna úr skorðum um stund í Washington í dag.

Heimsókn Hu Jintaos til Bandaríkjanna er sú fyrsta síðan hann varð þjóðarleiðtogi. En þó að viðhöfnin hafi verið mikil er heimsóknin ekki opinber og því hafa ekki verið skipulagðir gala kvöldverðir og leiðtogunum báðum óhætt að taka af sér bindið þegar kvölda tekur.

Á fundi með blaðamönnum hvatti Bush Hu Jintao meðal annars til að nota áhrif sín í langvinnri kjarnorkudeilu við Norður Kóreu.

En Kínaforsti var ekki nema rétt nýbyrjaður að tæpa á kjarnorkumálunum, þegar miðaldra kona úr röðum Falun Gong setti þessa formlegu athöfn alveg úr skorðum um stund með því að kalla hátt að Falun Gong samtökin væru að vinna gott verk og rétt væri að hætta að ofsækja félagsmenn í Kína. Hún sagði tíma Hu Jintao liðinn þar sem illmenni féllu frá fyrr en aðrir.

Þýðingar á orðum Hu Jintaos sem ómuðu í hátölurunum fóru að mestu framhjá viðstöddum, því að athyglin var öll á öskrum konunnar.

Síðan leið og beið og það var ekki fyrr en eftir drjúga stund að öryggisverðirnir námu konuna loks á brott. Þessi vinnubrögð standast engan samanburð við öryggisgæsluna hér á landi þegar Kínaforseti heimsótti Ísland árið 2002. Þá voru lögreglumenn heldur snarari í viðbrögðum þegar mótmælendur úr röðum Falun Gong öskruðu að Jiang Zemin.