Sagðir selja líffæri úr dauðadæmdum föngum

Kínverjar selja líffæri úr þúsundum dauðadæmdra fanga á hverju ári, án samþykkis þeirra. Þetta fullyrða bresk samtök sem hafa eftirlit með líffæraflutningum. Kínversk stjórnvöld neita ásökununum. Samtök skurðlækna sem framkvæma líffæraflutninga í Bretlandi fullyrða að á hverju ári sé líffærum beinlínis stolið úr þúsundum fanga sem dæmdir hafa verið til dauða í Kína. Sannanir fyrir þessu hafi hrannast upp undanfarið og ekki sé hægt að draga nema eina ályktun.

Þannig taki það oft ekki nema viku að para saman fólk sem sækir um líffæri við líffæragjafa og augljóst sé að fangarnir séu sérstaklega valdir áður en þeir séu teknir af lífi.

Það hefur færst í vöxt undanfarin ár að íbúar vestrænna ríkja fari til Kína til að fá ný líffæri og mannréttindasamtök víða um heim hafa um árabil sakað kínversk yfirvöld um að hafa óhreint mjöl í pokahorninu. Samtökin bresku hvetja líffæraþega til þess að hugsa sig vel um áður þeir ákveði að fara til Kína í aðgerð.

Kínverskir embættismenn neita ásökunum samtakanna hins vegar alfarið og segja að í þau fáu skipti sem líffæri séu notuð úr föngum sem hafi verið dæmdir til dauða, sé það alltaf með samþykki fanganna. Hin mikla leynd sem ríkir í kringum aftökur í Kína gerir alla upplýsingaöflun mjög erfiða og því stendur bara orð gegn orði.

Stjórnvöld í Kína ætla þó að reyna að reka af sér slyðruorðið með því að herða allar reglur og frá og með júlí verður þannig bannað að selja líffæri í landinu og eins verða undirskriftir líffæragjafa alltaf að liggja fyrir áður en farið er út í aðgerð.