Útilokar ekki notkun kjarnorkuvopna

Bush Bandaríkjaforseti vildi í gær ekki útiloka að kjarnorkuvopnum yrði beitt gegn Írönum. Hann sagði alla möguleika uppi á borðinu í kjarnorkudeilunni við stjórnvöld í Teheran. Utanríkisráðherra Rússa hvatti í dag Írana til að hætta auðgun úrans, alþjóðasamfélagið krefðist þess.

Á blaðamannafundi í gær var Bush Bandaríkjaforseti spurður hvort það kæmi til greina að beita kjarnavopnum gegn Írönum. Forsetinn sagði alla mögleika uppi á borðinu. Vilji sé fyrir því að leysa kjarnorkudeiluna með friðsamlegum hætti og að því sé unnið hörðum höndum.

Sendifulltrúar sex ríkja, Bandaríkjanna, Bretlands, Frakklands, Kína, Rússlands og Þýskalands, komu sama í Moskvu í gær til að ræða möguleg næstu skref í deilunni. Ekki tókst Bandaríkjamönnum og Bretum að fá það þegar í gegn að gripið yrði til refsiaðgerða ef Íranar hafi ekki hætt auðgun úrans fyrir 28. þessa mánaðar. Kínverjar og Rússar hafa ekki viljað samþykkja refsiaðgerðir.

Sergei Lavrov, utanríkisráðherra Rússa, sagði í morgun að engin endanleg niðurstaða hefði fengist á fundinum í gær og beðið yrði eftir skýrslu Alþjóða kjarnorkumálastofnunarinnar. Frakkar tóku í sama streng og sögðu rétt að bíða skýrslunnar áður en ákvörðun yrði tekin um refsiaðgerðir.

Jack Straw, utanríkisráðherra Bretlands, sagði í morgun að honum þætti ólíklegt að Íranar yrðu við kröfum alþjóðasamfélagsins. Hann sagðist því eiga von á því að málinu yrði vísað aftur til Öryggisráðs Sameinuðu þjóðanna þar sem ákvörðun yrði tekin um næstu skref.

David Albright, fyrrverandi vopna eftirlitsmaður Sameinuðu þjóðanna og kjarnorkusérfræðingur, segir Írana hafa stækkað vinnslusvæði sitt fyrir auðgun úrans í Isfahan og styrkt neðanjarðarvinnslustöðvar sínar í Natanz. Þetta hafi verið gert af ótta við árásir Bandaríkjamanna. Albright segir það geta því orðið afar erfitt að eyða vinnslustöðvum með loftárásum.