Saddam fyrirskipaði fjöldamorð

Saddam Hússein, fyrrverandi forseti Íraks, undirritaði skjöl þar sem fyrirskipuð voru morð á 148 sjía-múslimum árið 1982. Gögn þess efnis frá rithandarsérfræðingum voru lögð fyrir dóm í Írak í morgun.

Saddam og sjö aðrir eru ákærðir fyrir að hafa fyrirskipað eða átt þátt í morðunum sem voru framin eftir að reynt var að ráða Íraksforsetann fyrrverandi af dögum. Saksóknarar hafa lagt fram mörg þúsund gögn máli sínu til stuðnings. Verjendur í málinu segja undirskirftirnar falsaðar. Auk þess segja þeir rithandarsérfræðingana ekki óhlutdræga þar sem þeir tengist innanríkisráðuneyti Íraks.

Réttarhöldum yfir Hússein var frestað um tvo daga svo sérfræðingunum gæfist gott tóm til að grandskoða skjölin. Eitt þeirra er umrætt skjal þar sem Íraksforsetinn fyrrverandi mun hafa fyrirskipað morðin í Dujail. Réttað var yfir sjía-múslimunum 148 og þeir síðan teknir af lífi. Verði Hússein sakfelldur á hann yfir höfði sér dauðadóm.

Fyrr í þessu mánuði tilkynnti dómstóllinn í Írak að nýjar ákærur um þjóðarmorð og glæpi gegn mannkyninu yrðu birtar Saddam á næstunni. Þær tengjast ofsóknum á hendur Kúrdum í Norður-Írak síðla á níunda áratug síðustu aldar. Talið er að um 180 þúsund manns hafi þá látið lífið. Það mál verður tekið fyrir eitt og sér og óháð því sem nú er fyrir dómi.