Mótmælendur fylgja Kínaforseta hvert fótmál

Kína er þriðji stærsti útflutningsmarkaður Bandaríkjanna auk þess sem verðmæti innfluttra vara frá Kína til Bandaríkjanna í fyrra nam jafnvirði rúmlega tólf hundruð milljörðum íslenskra króna. Nokkur órói er þó meðal bandarískra stjórnmálamanna og stjórnenda fyrirtækja þar í landi sem velta því fyrir sér hvernig Kínverjar ætli að nýta sér stöðu sína í alþjóðasamfélaginu.

Það kemur því ekki á óvart að Hu Jintao, forseti Kína, hafi byrjað heimsókn sína á að funda með kaupsýslumönnum í Seattle. Fyrst átti hann fund með Bill Gates, stofnanda Microsoft, en bandaríski tölvurisinn hefur í nokkur ár barist gegn hugbúnaðarstuldi á þessu ört vaxandi markaði. Forsetinn fundaði síðan með öðrum forvígismönnum bandarískra fyrirtækja.

Hu Jintao mun á morgun eiga fund með Bush Bandaríkjaforseta þar sem búist er við að fjölmörg mál verði rædd, þar á meðal kjarnorkudeilurnar við stjórnvöld í Íran og Norður-Kóreu. Mótmælendur fylgja forsetanum hvert fótmál í heimsókn hans. Þeir krefjast þess að Kínverjar veiti Tíbet sjálfstæði og gefi Tævönum frelsi til að ákveða sjálfir hvort þeir vilji sameinast meginlandi Kína á ný. Meðal mótmælenda eru félagar í Falun Gong hreyfingunni sem Kínverjar líta á sem sem ofsatrúarhóp. Hreyfingin segir kínversk yfirvöld hafa ofsótt Falun Gong félaga og myrt þá. Því verði að linna.