Stuðningmenn forseta Tsjad láta í sér heyra

Stuðningsmenn Idriss Deby, forseta Tsjad, söfnuðust saman á götum höfuðborgar landsins í gær en rétt um hálfur mánuður eru í kosningar þar í landi. Uppreisnarmenn reyndu í síðustu viku að velta forsetanum úr sessi en hann hefur verið við völd í 16 ár.

Deby segir stjórnvöld í Súdan bera ábyrgð á árás andspyrnumanna á fimmtudag sem varð fjölmörgum að bana. Á föstudag ákvað forestinn að rjúfa tengsl við stjórnvöld í Súdan og vísa um tvö hundruð flóttamönnum frá Darfur héraði úr landi. Í gær varð forsetinn síðan við kröfu alþjóðasamfélagsins um að vernda flóttamennina.

Kofi Annan, framkvæmdastjóri Sameinuðu þjóðanna sagði í gærkvöld að hann teldi deiluna í Tsjad leysta í bili en ef hún héldi áfram að stigmagnast gæti það valdið miklum óstöðugleika í þessum heimshluta.