Sex látnir eftir sjálfsmorðsprengjuárás í Tel Aviv

Í það minnsta sex manns létust og þrjátíu særðust í sjálfsmorðsprengjuárás í Tel Aviv í Ísrael í morgun. Að því er Reuters-fréttastofan hermir sprengdi meðlimur í palenstínsku Al-Aksa-herdeildunum sprengjuna við skyndibitastað nærri fjölfarinni umferðarmiðstöð. Mahmoud Abbas, forseti palestínsku heimastjórnarinnar, hefur þegar fordæmt árásina en formælandi Hamas-samtakanna, sem nú leiða ríkisstjórn Palestínumanna, sagði rétt fyrir hádegi að hún hefði verið lögmæt sjálfsvörn. Síðast var slík árás framin í Ísrael í janúar en þá fórst einungis tilræðismaðurinn. Búast má við hörðum aðgerðum Ísraela vegna þessa ódæðis.