Hafa órækar sannanir fyrir fjöldamorðum Saddams

Írakskir saksóknarar segjast hafa órækar sannanir fyrir því að Saddam Hussein hafi undirritað skjöl sem tengjast fjöldamorðum á sjíum. Réttarhöld yfir einræðisherranum fyrrverandi hófust á ný í morgun.

Vitnaleiðslur hafa legið niðri í málaferlunum gegn Saddam Hussein síðan 5. apríl en í morgun hófust þær á nýjan leik. Saddam er gefið að sök að hafa fyrirskipað fjöldamorð á 148 sjíum í bænum Dujail árið 1982 og eru sjö samstarfsmenn hans ákærðir með honum. Saksóknarar lögðu fyrir réttinn í morgun skjöl þar sem samþykkt er að veita sérsveitarmönnum sérstaka viðurkenningu fyrir framgöngu sína í Dujail og staðfestu rithandarsérfræðingar að Saddam hefði sjálfur undirritað skjölin.

Saddam, sem að vanda var klæddur svörtum jakkafötum, vildi hvorki neita því né játa að undirskriftin væri hans. Verjandi hans sagði það hins vegar af og frá og krafðist þess að óháðir sérfræðingar færu yfir skjölin.

Eftir stutt orðaskak frestaði Raúf Abdul-Rahman yfirdómari réttarhaldinu til miðvikudagsins svo tími gæfist til að fara yfir fleiri skjöl sem tengjast málinu.